phūloñ meñ ek rañg hai ā.ankhoñ ke niir kā
manzar tamām-tar hai ye fasl-e-zamīr kā
rishta vo kyā huā mirī ā.ankhoñ se niir kā
muddat huī hai hādsa dekhe zamīr kā
paanī utar gayā to zamīñ sañglāḳh thī
tīkhā sā har savāl thā rāñjhe se hiir kā
terī azaañ ke saath maiñ uThtā huuñ pau phaTe
sar meñ liye hue koī sajda asiir kā
dekhā na dostoñ ne imārat ke us taraf
pūchhā kabhī na haal kisī ne faqīr kā
ā.īna gir paḌā thā mire haath se kabhī
phir yaad hādsa nahīñ koī zamīr kā
sahrā-e-jism ruuh ke andar utar gayā
ab kyā dikhā.e mo.ajaza insāñ zamīr kā
aañsū kī ek buuñd ko āñkheñ taras ga.iiñ
is dhuup meñ jhulas gayā dohā kabīr kā
aadhā falak ke paas thā aadhā zamīn par
maiñ nā-tamām ḳhvāb thā badar-e-munīr kā
pakke hurūf gard kī sūrat bikhar ga.e
siine meñ ghaav rah gayā kachchī lakīr kā
hotī raheñgī bārisheñ 'ahmad' visāl kī
ḳhālī rahegā jaam hamesha faqīr kā