ba-harf-e-sūrat inkār toḌ dī maiñ ne
diloñ ke biich kī dīvār toḌ dī maiñ ne
vo be-ḳhudī meñ tirā naam lab pe aa hī gayā
lo ye qasam bhī mire yaar toḌ dī maiñ ne
tire ġhubār-e-kaf-e-pā kī kaj-kulāhī meñ
ġhurūr-o-naḳhvat-e-dastār toḌ dī maiñ ne
is ājizī se kiyā us ne mere sar kā savāl
ḳhud apne haath se talvār toḌ dī maiñ ne
kuchh is tarah se baḌhī lazzat-e-ḳhalish dil kī
jigar meñ dard kī sūfār toḌ dī maiñ ne
sadā-e-nāla-e-be-iḳhtiyār se apne
tire sukūt kī raftār toḌ dī maiñ ne
mire jasārat-e-tarz-e-suḳhan kī daad to de
rivāyat-e-lab-o-ruḳhsār toḌ dī maiñ ne