din ko daftar meñ akelā shab bhare ghar meñ akelā

maiñ ki aks-e-muntashir ek ek manzar meñ akelā

uḌ chalā vo ik judā ḳhāka liye sar meñ akelā

sub.h kā pahlā parinda āsmāñ bhar meñ akelā

kaun de āvāz ḳhālī raat ke andhe kueñ meñ

kaun utre ḳhvāb se mahrūm bistar meñ akelā

us ko tanhā kar ga.ī karvaT koī pichhle pahar kī

phir uḌā bhāgā vo saarā din nagar bhar meñ akelā

ek maddham aañch sī āvāz sargam se alag kuchh

rañg ik dabtā huā sā puure manzar meñ akelā

boltī tasvīr meñ ik naqsh lekin kuchh haTā sā

ek harf-e-mo'tabar lafzoñ ke lashkar meñ akelā

jaao maujo merī manzil kā pata kyā pūchhtī ho

ik jazīra duur uftāda samundar meñ akelā

jaane kis ehsās ne aage nahīñ baḌhne diyā thā

ab paḌā huuñ qaid maiñ raste ke patthar meñ akelā

hū-ba-hū merī tarah chup-chāp mujh ko dekhtā hai

ik laraztā ḳhūb-sūrat aks sāġhar meñ akelā