phir vahī tū saath mere phir vahī bastī purānī

ek ik rasta hai terī raunaq-e-pā kī kahānī

ai gul-e-āvārgī terī mahak tāroñ se khele

ai nadī bahtā rahe daa.im tirā bedār paanī

sabz niilī dhund meñ Duube pahāḌoñ se utartī

kyā ajab manzar-ba-manzar raushnī hai dāstānī

ik ghane sarshār hāsil kī fazā hai aur donoñ

ab nahīñ hai darmiyāñ koī bhī manzil imtihānī

maiñ ki thā munkir tirā aur ab ki maiñ qaa.il khaḌā huuñ

ai visāl-e-lamha-lamha ai atā-e-āsmānī