kuchh to hamāre darmiyāñ hai dil-lagī abhī
terī nigāh-e-nāz meñ hai tishnagī abhī
ḳhāmoshiyāñ ajiib haiñ is sard shahr kī
barfīlī is havā meñ hai dīvāngī abhī
sauġhāt mil rahī hai tirī yaad kī mujhe
is hijr ne sikhā.ī bahut shā.irī abhī
vo biit hī ga.ī jo amāvas kī raat thī
phailī hai mere chāroñ taraf chāñdnī abhī
jaane vo kaun log the jo kar ga.e vafā
tum se to ho sakī na zarā dilbarī abhī
ab bhī 'hinā' sahegā na-jāne vo kitne ġham
qismat meñ us kī hai likhī ye be-gharī abhī