kabhī bahāroñ ke mausamoñ meñ jo dil kī bastī ġhazal-sarā thī

vahīñ kahīñ ek aarzū ke machalne kī bhī baḌī kathā thī

jalā ke jab saarī kashtiyāñ maiñ samundaroñ kī banī ġhizā thī

usī ghaḌī to jabīn-e-shab par likhī ga.ī merī bhī duā thī

binā sahāroñ ke ziist mushkil guzār aa.e to phir ye jaanā

ki maiñ hī apne hasīñ chaman kā zamīn-e-nam thī shajar ghanā thī

mohabbateñ bhī rifāqateñ bhī adāvateñ aur nadāmateñ bhī

mirā asāsa maiñ jāntī thī kahāñ vafā thī kahāñ jafā thī

virāsatoñ kī kitāb kholī to naam merā kahīñ nahīñ thā

maiñ chup thī sochā ki is meñ shāyad mire qabīle kī bhī razā thī

jalegā dil to dhuāñ uThegā ye aag aise nahīñ bujhegī

nagar nagar ye ḳhabar pahuñchtī magar havā kī ajab dishā thī

bahut pukārā thā manziloñ ne 'hinā' mujhe un hī rāstoñ se

magar musalsal safar thā merā kahīñ na rukne meñ hī baqā thī