sitam kī teġh ye kahtī hai sar na ūñchā kar

pukārtī hai bulandī ki zindagī hai idhar

chaman meñ ham na raheñge tire palaTne tak

Thahar Thahar zarā jaatī huī bahār Thahar

koī fareb na khaa.e safed-poshī se

na jaane kitne sitāre nigal ga.ī hai sahar

tū jauhrī hai to zebā nahīñ tujhe ye gurez

mujhe parakh mirī shohrat kā intizār na kar

'hafīz' kitne hī chehre udaas hone lage

hamāre fan ko sarāheñ bahut na ahl-e-nazar