musībat jis se zaa.il ho rahī sāmān kar degā
na ghabrānā ḳhudā sab mushkileñ āsān kar degā
ḳharābāt-e-jahāñ meñ kaun hai dil-soz saaqī sā
agar tarchhaT bhī denā hai to tujh ko chhān kar degā
qanā.at kī bhī daulat ho to istiġhnā nahīñ lāzim
jise tū naf.a samjhā hai yahī nuqsān kar degā
jagah dil meñ na de shauq-e-numū-dārī burī shai hai
yahī chaskā tujhe barbād ai nādān kar degā
kahūñgā aaj se maiñ sāhib-e-ejāz nāseh ko
agar mere dil-e-muztar kā itmīnān kar degā
tamannāoñ kī mehmānī tasavvur ke havāle kar
ki jo sāmāñ munāsib hai vahī sāmān kar degā
matā-e-be-bahā se kam na jaan ai chashm ashkoñ ko
yahī ronā tirā ḳhālī tirī dūkān kar degā
koī gar saltanat bhī de to vāpas kar na le ai dil
subuk har tarf tujh ko ġhair kā ehsān kar degā
kahe detā huuñ qātil le ḳhabar jāñ-bāz kī apne
fanā shauq-e-shahādat meñ kisī din jaan kar degā
tirī rū-poshiyāñ ai husn kab be-kār jā.eñgī
yahī parda ayaañ aalam meñ terī shaan kar degā
yaqīñ kar le ki ḳhud vo jalva-gar parde meñ hai varna
yahī zālim gumāñ terā tujhe hairān kar degā
ġhazal se kyā murād ai 'shād' hai arbāb-e-ma.anī kī
kisī din tasfiya us kā mirā dīvān kar degā