ye aur baat hai ki madavā-e-ġham na thā

lekin tirā ḳhulūs tavaqqo se kam na thā

kyā kyā farāġhateñ thiiñ mayassar hayāt ko

vo din bhī the ki tere sivā koī ġham na thā

kuchh ham girift-e-gardish-e-daurāñ meñ aa ga.e

kuchh dil bhī tere ishq meñ sābit-qadam na thā

aa.e haiñ yaad tujh se bichhaḌ kar vo log bhī

jin se ta.alluqāt bigaḌne kā ġham na thā

vo daur-e-ishq mahz bhī kiyā vaqt thā 'azīm'

jab dil pe naqsh mohr-o-nishān-e-sitam na thā