ġham kā ye salīqa bhī rah gayā hai ab ham tak

zaar zaar rote haiñ aañkh meñ nahīñ nam tak

yaad jaane vāloñ kī raushnī ḳhayāloñ kī

dil kā saath detī hai ek manzil-e-ġham tak

tujh se mil ke bhī terā intizār rahtā hai

sub.h rū-e-ḳhandāñ se shaam zulf-e-barham tak

ab nishāñ mile shāyad manzil-e-tamannā kā

tere hijr ke ġham se aa ga.e tire ġham tak

ek dard-e-hastī ne umr bhar rifāqat kī

varna saath detā hai kaun āḳhirī dam tak