sub.h-e-vafā se hijr kā lamha judā karo

manzil se gard, gard se rasta judā karo

ik naqsh ho na paa.e idhar se udhar mirā

jaisā tumheñ milā thā maiñ vaisā judā karo

shab-zād-gāñ! tum ahl-e-ḳhabar se nahīñ so tum!

apnā madār apnā madīna judā karo

yaañ pai-ba-pai jo ḳhvāb khule nai-ba-nai khule

jitnā judā ye ho sake utnā judā karo

maiñ thā ki apne-āp meñ ḳhālī sā ho gayā

us ne to kah diyā mirā hissa judā karo