ye ḳhākī pairahan ik ism kī bandish meñ rahtā hai

zamāna har ghaḌī varna na.ī sāzish meñ rahtā hai

isī baa.is maiñ apnā nisf rakhtā huuñ añdhere meñ

mire atrāf bhī sūraj koī gardish meñ rahtā hai

maiñ ik parkār sā sayyār bhī huuñ aur sābit bhī

jahāñ saarā mire qadmoñ kī paimā.ish meñ rahtā hai

mirī āñkhoñ meñ ab hai maujzan bas ret vahshat kī

samundar ab kahāñ palkoñ kī har jumbish meñ rahtā hai

supurd-e-āb yuuñ hī to nahīñ kartā huuñ ḳhaak apnī

ajab miTTī ke ghulne kā mazā bārish meñ rahtā hai

tasallut hai kisī kā jab se apnī zaat par 'sārim'

hamārā dil bahut ārām-o-āsā.ish meñ rahtā hai