karūñ jo tanqīd zulmatoñ par
to aa.egā harf hikmatoñ par
futūr-e-millat junūn-e-maz.hab
ye raqs karte haiñ vahshatoñ par
shu.ūr-e-insān pal rahā hai
ḳhudā kī bastī meñ nafratoñ par
ye sāzishoñ ke muhīb saa.e
haiñ chhā.e sadiyoñ se ulfatoñ par
ye raqs kaisā hai jān-o-tan meñ
huuñ mahv-e-hairat mohabbatoñ par
mahak uThī haiñ fazā.eñ saarī
hai kaisī barsāt parbatoñ par
'shafaq' bahāyā na ik bhī aañsū
diloñ pe TuuTī qayāmatoñ par