yaad aatī rahī bhulā na sake
sham.a jaltī rahī bujhā na sake
chāñd-tāre gul-o-chaman mil kar
dil kī ik dāstāñ sunā na sake
aas bāñdhī thī jin sitāroñ se
der tak vo bhī jagmagā na sake
naġhma kyā mutribān-e-ahd-e-jadīd
taar TuuTe hue milā na sake
aaj vo rahbar-e-ḳhalā.iq haiñ
ḳhud ko jo aadmī banā na sake
panja-e-gul se bhī ye matvāle
dāman-e-zindagī chhuḌā na sake
ġham ke maare hue qulūb 'nushūr'
dard kī sarhadoñ ko pā na sake