ye nīm-bāz tirī añkhḌiyoñ ke maiḳhāne
nazar mile to chhalak jaa.eñ dil ke paimāne
sharāb-e-shauq se bojhal laboñ ke paimāne
tirī nigāh ko aise meñ kaun pahchāne
kahīñ kalī ne tabassum kā raaz samjhā hai
jo ḳhud chaman hai vo apnī bahār kyā jaane
jo hosh meñ thā to koī na mai-ba-jām aayā
bahak gayā huuñ to duniyā chalī hai samjhāne
ajab nahīñ jo mohabbat mujhe samajh na sake
vo ajnabī huuñ jise ziist bhī na pahchāne
yahīñ sujūd-e-mohabbat kī bastiyāñ thiiñ kabhī
batā rahe haiñ ye dair-o-haram ke vīrāne
kahīñ charāġh jalāne kī ho rahī hai sabīl
bujhā rahe haiñ yahāñ sham.a ḳhud hī parvāne
fareb-e-mashriq-o-maġhrib haiñ rahravān-e-jadīd
ye bad-nasīb na aaqil hue na dīvāne
vo zinda hai jo bahe mauj-e-vaqt kī rau meñ
vo zinda-tar hai jo tūfāñ meñ Thairnā jaane
maiñ apnī bazm se itnā hī duur huuñ ki 'nushūr'
mirī navāoñ se kuchh āshnā haiñ begāne