rañg kahāñ hai saayā sā hai
naqsh kahāñ hai dhokā sā hai
sub.h kī rañgat zardī-mā.il
shaam nahīñ hai dhaḌkā sā hai
dil kā ḳhuun huā ho shāyad
duur pare jo kohrā sā hai
sail-e-ishq thamā kab hogā
dariyā hai aur chaḌhtā sā hai
lab us ke jo khulte dekhe
ek jahāñ kuchh hañstā sā hai
asl meñ naqsh-e-kaif-e-hastī
faanī sā hai miTtā sā hai
husn aur ishq haiñ donoñ kāfir
donoñ meñ ik jhagḌā sā hai
aao pyaar se dho leñ us ko
naqsh-e-jahāñ kuchh mailā sā hai