ai shauq-e-dil bhī ek muammā ajiib hai

sahrā ko āñdhiyoñ kī tamannā ajiib hai

maujoñ ke iztirāb ne dhaḌkā diyā thā dil

utre jo ham utar gayā dariyā ajiib hai

dushvār ho ga.ī hai ab apnī shanāḳht bhī

ā.īna kah rahā hai ki chehra ajiib hai

shāḳheñ jo mere sahn meñ haiñ un meñ phal na aa.e

ham saa.e kā daraḳht bhī kitnā ajiib hai

uThtī hai ik fasīl to girtī hai ik fasīl

'fāḳhir' ye chāhatoñ kā gharauñdā ajiib hai