ye log ḳhvāb bahut karbalā ke dekhte haiñ
magar ġhanīm ko gardan jhukā ke dekhte haiñ
sunā hai barf-ruteñ raushnī se Dartī haiñ
so ik charāġh ko ham bhī jalā ke dekhte haiñ
unheñ kaho ki kabhī jañgaloñ kī samt bhī aa.eñ
jo bastiyoñ meñ karishme ḳhudā ke dekhte haiñ
junūñ meñ koī izāfa nahīñ hai muddat se
ġhubār-e-jism bhī ab ke uḌā ke dekhte haiñ
ye dil hai Thahrī huī jhiil kī tarah kab se
ab is meñ phir koī patthar girā ke dekhte haiñ
phir ik ḳhayāl ko zanjīr kar diyā ham ne
phir ek naam ko dil se miTā ke dekhte haiñ