jis ko honā hai vo in āñkhoñ se ojhal ho jaa.e

us se pahle ki mirā kaam mukammal ho jaa.e

maiñ to bas dekhtā rahtā huuñ zamīnoñ ke kaTāo

aadmī sochne vaalā ho to pāgal ho jaa.e

kahīñ aisā na ho vīrāne hoñ phir se ābād

kahīñ aisā na ho har shahr hī jañgal ho jaa.e

ye zamīñ jis pe hai gulzāroñ kī ta.adād bahut

ye bhī ho saktā hai kal ko vahī maqtal ho jaa.e

reg-zāroñ se buḳhārāt hī uThte haiñ magar

kaun jaane ki ye garmī koī bādal ho jaa.e

merā pindār hī dīvār hai nākāmī kī

ye jo gir jaa.e to har ḳhvāb mukammal ho jaa.e