yaqīñ se nikle to jaise gumāñ kī zad meñ haiñ

ye kyā tazād hai ham kis ziyāñ kī zad meñ haiñ

bahut tavīl haiñ goyā rutoñ kī zanjīreñ

na.e shagūfe sabhī raftagāñ kī zad meñ haiñ

unheñ nasīb ho ab māvarā koī saa.at

azal se peḌ bahār-o-ḳhizāñ kī zad meñ haiñ

vahī safar hai samundar bhī kashtiyāñ bhī vahī

havā.eñ ab ke magar bādbāñ kī zad meñ haiñ

suno charāġh bujhā do tamām ḳheme ke

mire aziiz shab-e-imtihāñ kī zad meñ haiñ

jo ham pe arsa-e-ḳhush-manzarī meñ biit ga.iiñ

kahāniyāñ haiñ magar kab bayāñ kī zad meñ haiñ