thā makān-e-dil kisī aur kā pa rahā basā koī dūsrā

maiñ kisī ke hijr meñ muztarib mujhe chāhtā koī dūsrā

tirā rañg sab se judā sahī tirī shakl sab se hasīñ magar

mirā mubtadā koī aur hai mirā muntahā koī dūsrā

mire log gard-o-ġhubār meñ tire yaar tere dayār meñ

tū asīr-e-manzil-e-shash-jihat mirā rāsta koī dūsrā

maiñ zarā sī baat pe ruuTh kar to nahīñ gayā tirī bazm se

mire mehrbāñ kabhī sochtā thā mo.āmla koī dūsrā

yahī āsmāñ mirā aasrā yahī ḳhāk-e-ḳhil.at-e-be-bahā

mirī jā.edād-e-junūñ jise nahīñ bāñTtā koī dūsrā