chamak rahā hai mirā sar bhī maiñ bhī duniyā bhī

ik ā.īna hai samundar bhī maiñ bhī duniyā bhī

khulā ki ek hī rishte meñ munsalik haiñ tamām

ye merā sar bhī ye patthar bhī maiñ bhī duniyā bhī

kisī gunāh kī pādāsh meñ haiñ sab zinda

mire shajar mire manzar bhī maiñ bhī duniyā bhī

utar rahe haiñ sabhī ik nasheb kī jānib

bulandiyoñ se ye patthar bhī maiñ bhī duniyā bhī

ḳhabar kisī ko kisī kī nahīñ yahāñ lekin

havā kī zad pe gul-e-tar bhī maiñ bhī duniyā bhī