ḳhushk āñkhoñ se nikal kar āsmāñ par phail jā

ai ġhubār-e-ārzū tā-hadd-e-manzar phail jā

motiyoñ kī ābrueñ lūTne vaale bahut

siip ke qaidī samundar-dar-samundar phail jā

yuuñ palak par jagmagānā do ghaḌī kā aish hai

raushnī ban kar mire andar hī andar phail jā

aa mire siine se lag jā tū agar sailāb hai

aur ḳhushbū hai to jā bastī meñ ghar ghar phail jā

naqsh-e-pā pāmāl rāhoñ par lagā degā tujhe

rāste meñ gard kī mānind uḌ kar phail jā