kyā kartā maiñ ham-asroñ ne tanhā mujh par chhoḌ diyā

sab ne bosa de kar sach kā bhārī patthar chhoḌ diyā

Dhīlā paḌtā thā suulī kā phandā us kī gardan par

mere qātil ko munsif ne fidya le kar chhoḌ diyā

dariyā ke ruḳh bahne vaalī machhlī murda machhlī hai

us kashtī kī ḳhair nahīñ hai jis ne lañgar chhoḌ diyā

sho.aloñ kī is hamdardī par dil meñ laavā paktā hai

jab saarī bastī phūñkī thī kyuuñ merā ghar chhoḌ diyā

sūraj ne bhī soch samajh kar jaal bichhā.e kirnoñ ke

shabnam shabnam Daaka Daalā aur samundar chhoḌ diyā

saarā ghar sotā hai do ghanTe meñ aa.egā aḳhbār

aaj 'muzaffar' pāñch baje hī kaise bistar chhoḌ diyā