baat sach-much meñ nirālī ho ga.ī
ab nasīhat ek gaalī ho ga.ī
ye asar ham par huā is daur kā
bhāvnā dil kī mavālī ho ga.ī
Daal diiñ bhūke ko jis meñ roTiyāñ
vo samajh puujā kī thālī ho ga.ī
tai kiyā chalnā judā jab bhiiḌ se
har nazar dekhā savālī ho ga.ī
qaid kā itnā maza mat lījiye
ro paḌeñge gar bahālī ho ga.ī
ik amāvas hī to thī apnī hayāt
mil ga.e tum to divālī ho ga.ī
haath meñ qātil ke 'nīraj' phuul hai
baat ab ghabrāne vaalī ho ga.ī