begāngī meñ yūñhī guzārā kareñge ham

bechain hoñ to ḳhud ko pukārā kareñge ham

ābādiyoñ ke huzn meñ sahrā ke shahr meñ

bastī na.ī basā ke nazārā kareñge ham

apne dukhoñ ko un kī ḳhushī meñ chhupā.eñge

un kī hañsī kī bheñT utārā kareñge ham

jo jī meñ aa.egā vo kareñge surūr meñ

phir fasl-e-gul ko ba.ad gavārā kareñge ham

nā-āshnā habīb kī be-e'tinā.ī par

bazm-e-taḳhayyulāt sañvārā kareñge ham

az-rū-e-intiqām tire dar tak ā.eñge

az-rū-e-mehar tujh se kinārā kareñge ham

apne har ek jhuuT pe īmān lā.eñge

apnī anā kā bojh utārā kareñge ham