parinde āzmā.e jā rahe the
paroñ se ghar banā.e jā rahe the
kisī sahrā se aatī thiiñ sadā.eñ
kahīñ peḌoñ ke saa.e jā rahe the
gharoñ se log hijrat kar rahe the
charāġhoñ ko bujhā.e jā rahe the
purāne peḌ kaTte jā rahe the
na.e paude lagā.e jā rahe the
kahīñ mā-ba.ad ham ne aañkh kholī
hameñ sapne dikhā.e jā rahe the
mohabbat nā-mukammal rah ga.ī thī
purāne ḳhat jalā.e jā rahe the
udhar sūraj saroñ par aa rahā thā
idhar jismoñ se saa.e jā rahe the
ajab vo sāneha thā chhoḌ kar jab
sabhī apne parā.e jā rahe the