roz ḳhvāboñ meñ na.e rañg bharā kartā thā
kaun thā jo mirī āñkhoñ meñ rahā kartā thā
uñgliyāñ kaaT ke vo apne lahū se aksar
phuul pattoñ pe mirā naam likhā kartā thā
kaisā qātil thā jo hāthoñ meñ liye thā ḳhanjar
chupke chupke mire jiine kī duā kartā thā
haa.e qismat ki yahī chhoḌ ke jaane vaalā
umr bhar saath nibāheñge kahā kartā thā
phuul sā jism sulagte hue sandal kī tarah
dil ke mandir meñ sar-e-shām jalā kartā thā
vo jo ik lamha kisī yaad meñ kaTtā thā 'nazīr'
dil ke jalte hue sho.aloñ ko havā kartā thā