kuchh der sādgī ke tasavvur se haT ke dekh
likkhā huā varaq huuñ mujhe phir ulaT ke dekh
maanā ki tujh se koī ta.alluq nahīñ magar
ik baar dushmanoñ kī tarah hī palaT ke dekh
phir pūchhnā ki kaise bhaTaktī hai zindagī
pahle kisī patañg kī mānind kaT ke dekh
tā umr phir na hogī ujāloñ kī aarzū
tū bhī kisī charāġh kī lau se lipaT ke dekh
sajde tujhe karegī kisī roz ḳhud hayāt
bāñhoñ meñ hādsāt-e-jahāñ kī simaT ke dekh
tanhā.iyoñ meñ saikḌoñ sāthī bhī haiñ 'nazīr'
hai shart apnī zaat ke hissoñ meñ baT ke dekh