sarishk-e-ḳhūñ sar-e-mizhgāñ kabhī piro.e na the
ham itnā hañsne ke ba.ad is tarah se ro.e na the
sitam ye hai ki vo ḳhurshīd kāTne aa.e
tamām umr sitāre jinhoñ ne bo.e na the
ab aap apnī tamannāoñ se huuñ sharminda
ye daaġh vo haiñ jo maiñ ne lahū se dho.e na the
bahe vo ashk ki ġharqāb ho ga.iiñ āñkheñ
safīne is tarah ham ne kabhī Dubo.e na the
charāġh laao koī āftāb hī DhūñDeñ
ham is qadar kabhī tārīkiyoñ meñ kho.e na the
ik āh-e-sard ke ba.ad āñkheñ muuñd liiñ 'mohsin'
ye kyā huā kabhī ThanDī havā meñ so.e na the