phir kisī ḳhvāb ke parde se pukārā jā.ūñ
phir kisī yaad kī talvār se maarā jā.ūñ
phir koī vus.at-e-āfāq pe saaya Daale
phir kisī aañkh ke nuqte meñ utārā jā.ūñ
din ke hañgāmoñ meñ dāman kahīñ mailā ho jaa.e
raat kī nuqra.ī ātish meñ nikhārā jā.ūñ
ḳhushk kho.e hue gumnām jazīre kī tarah
dard ke kaale samundar se ubhārā jā.ūñ
apnī khoī huī jannat kā talabgār banūñ
dast-e-yazdāñ se gunahgār sañvārā jā.ūñ