ye phailtī shikastagī ehsās kī taraf
dariyā ravāñ-davāñ haiñ mirī pyaas kī taraf
us kā badan jhukā huā patthar kī bench par
apne qadam bhī muḌte hue ghaas kī taraf
dikhlā rahī hai dhuup bashāshat kā aa.ina
aur chhāñv khīñchtī hai mujhe yaas kī taraf
ashiyā kī lazzatoñ meñ aTaktā huā badan
aur ruuh kā khiñchāv hai ban-bās kī taraf
sab ye samajh rahe the ki nirvān mil gayā
chakrā rahī hai chiil magar maas kī taraf