bismil ke taḌapne kī adāoñ meñ nasha thā
maiñ haath meñ talvār liye jhuum rahā thā
ghūñghaT meñ mire ḳhvāb kī tābīr chhupī thī
mehñdī se hathelī meñ mirā naam likhā thā
lab the ki kisī pyālī ke hoñToñ pe jhuke the
aur haath kahīñ gardan-e-mīnā meñ paḌā thā
hammām ke ā.īne meñ shab Duub rahī thī
cigarette se na.e din kā dhuāñ phail rahā thā
dariyā ke kināre pe mirī laash paḌī thī
aur paanī kī tah meñ vo mujhe DhūñDh rahā thā
mālūm nahīñ phir vo kahāñ chhup gayā 'ādil'
saaya sā koī lams kī sarhad pe milā thā