ab TūTne hī vaalā hai tanhā.ī kā hisār
ik shaḳhs chīḳhtā hai samundar ke ār-pār
āñkhoñ se raah niklī hai tahtush-shu.ūr tak
rag rag meñ reñgtā hai sulagtā huā ḳhumār
girte rahe nujūm añdhere kī zulf se
shab bhar rahīñ ḳhamoshiyāñ sāyoñ se ham-kanār
dīvār-o-dar pe ḳhushbū ke haale bikhar ga.e
tanhā.ī ke farishtoñ ne chūmī qabā-e-yār
kab tak paḌe rahoge havāoñ ke haath meñ
kab tak chalegā khokhle shabdoñ kā kārobār