har ḳhvāb kaalī raat ke sāñche meñ Dhaal kar
ye kaun chhup gayā hai sitāre uchhāl kar
aaise Dare hue haiñ zamāne kī chaal se
ghar meñ bhī paañv rakhte haiñ ham to sambhāl kar
ḳhāna-ḳharābiyoñ meñ tirā bhī pata nahīñ
tujh ko bhī kyā milā hameñ ghar se nikāl kar
jhulsā gayā hai kāġhzī chehroñ kī dāstāñ
jaltī huī ḳhamoshiyāñ lafzoñ meñ Dhaal kar
ye phuul ḳhud hī suukh kar ā.eñge ḳhaak par
tū apne haath se na inheñ pā.emāl kar