kaun thā vo ḳhvāb ke malbūs meñ lipTā huā
raat ke gumbad se Takrā kar palaT aa.ī sadā
maiñ to thā bikhrā huā sāhil kī piilī ret par
aur dariyā meñ thā niilā āsmāñ Duubā huā
soch kī sūkhī huī shāḳhoñ se murjhā.e hue
TuuT kar girte hue lafzoñ ko maiñ chuntā rahā
jab bhī ḳhud kī khoj meñ niklā huuñ apne jism se
kaalī tanhā.ī ke jañgal se guzarnā hī paḌā
phailtā jaatā hai ThanDī chāñdnī ke saath saath
sho.ala sho.ala lazzatoñ kī tishnagī kā dā.era