paanī ko patthar kahte haiñ
kyā kuchh dīda-var kahte haiñ
ḳhush-fahmī kī had hotī haiñ
ḳhud ko dānish-var kahte haiñ
kaun lagī-lipTī rakhtā hai
ham tere muñh par kahte haiñ
Thiik hī kahte hoñge phir to
jab ye professor kahte haiñ
sab un ko andar samjhe the
vo ḳhud ko bāhar kahte haiñ
terā is meñ kyā jaatā hai
apne khañDar ko ghar kahte haiñ
nazm samajh meñ kab aatī hai
dekh is ko mantar kahte haiñ