sher kahne kī tabī.at na rahī

jis se aamad thī vo sūrat na rahī

us kī dahlīz se uTh jā.ūñ magar

log socheñge mohabbat na rahī

ab milā adl, gayā daur-e-shabāb

munsifī terī bhī vaq.at na rahī

vaqt kī dauḌ meñ ruknā thā kaThin

saañs lene kī bhī fursat na rahī

vaqt-e-dīdār ajab hukm huā

hosh khone kī ijāzat na rahī

tum se jazbāt the jab tum hī nahīñ

phir zamāne se shikāyat na rahī

maiñ nikal aa.uuñ bayābāñ se agar

shohra ho jā.egā vahshat na rahī

bhiiḌ meñ DhūñDeñ kahāñ qais ko ab

vo jo pahchān thī vahshat na rahī

daur-e-rafta ke namūne ho 'salām'

ab takalluf kī zarūrat na rahī