ye mat samajh ki tire saath kuchh nahīñ karegā
nizām-e-arz-o-samāvāt kuchh nahīñ karegā
ye terā maal kisī roz Das hī legā tujhe
agar tū is meñ se ḳhairāt kuchh nahīñ karegā
abhī piTārī to kholī nahīñ madārī ne
tū kah rahā hai kamālāt kuchh nahīñ karegā
mujhe yaqīn dilā sab rahegā vaisā hī
junūn-e-ahl-e-ḳharābat kuchh nahīñ karegā
hamīñ sabīl nikāleñge baiThne kī koī
vo shaḳhs bahr-e-mulāqāt kuchh nahīñ karegā
agar diloñ meñ lapaktī hai aag nafrat kī
to phir ye ahd-e-muvāḳhāt kuchh nahīñ karegā