dushman kī baat jab tirī mahfil meñ rah ga.ī
ummīd yaas ban ke mire dil meñ rah ga.ī
tū ham se chhap gayā to tirī shakl-e-dil-fareb
tasvīr ban ke ā.īna-e-dil meñ rah ga.ī
niklā vahāñ se maiñ to mire dil kī aarzū
sar pīTtī huī tirī mahfil meñ rah ga.ī
dekhā jo qatl-e-ām to har laash par ajal
ik aah bhar ke kūcha-e-qātil meñ rah ga.ī
maiñ kyā kahūñ 'rasā' ki mire dil pe kyā banī
talvār khich ke jab kaf-e-qātil meñ rah ga.ī