diyā muñDer pe dil kī jalā rahī huuñ maiñ

havā-mizāj ko vāpas bulā rahī huuñ maiñ

mujhe kisī ke bhī jaane se dukh nahīñ hotā

na jaane kis liye aañsū bahā rahī huuñ maiñ

ye terī marzī ki aa.e na aa.e vāpas tū

nizām-e-dil ko to dil se chalā rahī huuñ maiñ

isī charāġh se har samt raushnī hogī

jalā hai dil to diye sab bujhā rahī huuñ maiñ

jo haath aaj mujhe thāmte nahīñ haiñ 'shabī'

ga.e dinoñ meñ to un kī duā rahī huuñ maiñ