pyaar meñ tānā-bānā chaltā rahtā hai
rūThnā aur manānā chaltā rahtā hai
va.ade aur irāde TuuTe rahte haiñ
piinā aur pilānā chaltā rahtā hai
na.ī-navelī kaliyāñ khiltī rahtī haiñ
phūloñ kā murjhānā chaltā rahtā hai
pyaar ke giit sunāte rahte haiñ bhañvre
kaliyoñ kā sharmānā chaltā rahtā hai
phūloñ kī rañgat do ik din chal paatī hai
ḳhushbū kā mahkānā chaltā rahtā hai