isī liye to haar kā huā nahīñ malāl tak
vo mere saath saath thā uruuj se zavāl tak
nahīñ hai sahl is qadar ki jī sake har ek shaḳhs
balā-e-hijr kī rutoñ se mausam-e-visāl tak
hamārī kisht-e-ārzū ye dhuup kyā jalā.egī
tumhārā intizār ham kareñge barshgāl tak
amiiq zaḳhm is qadar ba-dast-e-roz-o-shab mile
ki mundamil na kar sakī davā-e-māh-o-sāl tak
qubā-e-zard-o-surḳh kā ye imtizāj al-amāñ
jamāl ko vo le gayā pare had-e-kamāl tak