aisī bhī kahāñ be-sar-o-sāmānī huī hai

jo sab ko mujhe dekh ke hairānī huī hai

dil meñ to tirī yaad thī ik buuñd lahū kī

āñkhoñ meñ jo aa.ī to yahī paanī huī hai

qulzum kā hai ezaaz ki tahdārī kī har mauj

is zulf-e-girah-gīr kī dīvānī huī hai

kyā DhūñDne niklī hai kisī qais ko pāgal

is darja jo ye bād-e-bayābānī huī hai

āseb-zada haiñ dar-o-dīvar-e-shab-o-roz

kis darja mah o saal kī vīrānī huī hai

bo.e haiñ bahut chashm-e-tamannā meñ yahāñ ḳhvāb

tab jā ke zamīñ dil kī ye bārānī huī hai