ab sochiye to dām-e-tamannā meñ aa ga.e
dīvār o dar ko chhoḌ ke sahrā meñ aa ga.e
tasvīr the jo avvalīñ sarshāriyoñ meñ log
vo zaḳhm ban ke chashm-e-tamannā meñ aa ga.e
un se bhī pūchhiye kabhī apnī zamīñ kā karb
jo sāhiloñ ko chhoḌ ke dariyā meñ aa ga.e
vahshat ne yuuñ to ḳhuub diyā har qadam pe saath
lekin tire fareb-e-dil-ārā meñ aa ga.e
is anjuman meñ anjum o zohra bhī the magar
ham shab-guzīda sehr-e-surayyā meñ aa ga.e