ḳhushī kī baat aur hai ġhamoñ kī baat aur

tumhārī baat aur hai hamārī baat aur

koī agar jafā kare nahīñ hai kuchh gila mujhe

kisī kī baat aur hai tumhārī baat aur

huzūr sun bhī lījiye chhoḌ kar ke jā.iye

zarā sī baat aur hai zarā sī baat aur

qit.a rubā.ī aur nazm ḳhūb-tar sahīh magar

ġhazal kī baat aur hai ġhazal kī baat aur

zabāñ se 'tābāñ' mat kaho nazar se iltijā karo

zabāñ kī baat aur hai nazar kī baat aur