ilāhī ḳhair ho ab apne āshiyāne kī
nigāheñ us kī taraf phir uThīñ zamāne kī
havā-e-tund guzar jaa.e sar-nigūñ ho kar
ik aisā āshiyāñ koshish karo banāne kī
ḳhizāñ ke aane se ho jaa.eñ ġham-zada jo phuul
unheñ qasam hai bahāroñ meñ muskurāne kī
kisī kī barq-e-nazar se na bijliyoñ se jale
kuchh is tarah kī ho ta.amīr āshiyāne kī
vo pūchhte haiñ ki din kis tarah guzarte haiñ
ye koī baat hai 'tābāñ' unheñ batāne kī