rahbaro bolo mājrā kyā hai
ye fasādoñ kā silsila kyā hai
sidq dil se agar na ho aabid
un duāoñ kā aasrā kyā hai
kuchh samajh meñ mirī nahīñ aatā
dil lagāne se fā.eda kyā hai
Thokareñ gardisheñ ġham-o-ālām
aur taqdīr meñ likhā kyā hai
jī to ye chāhtā hai mar jaa.eñ
zindagī ab tirī razā kyā hai
ishq īmān hai mirā nāseh
dil dukhāne se fā.eda kyā hai
aaj maġhmūm kyuuñ ho ai 'tābāñ'
kuchh to bolo ki mājrā kyā hai