kahāñ se DhūñDh ke lā.ūñ purāne ḳhvāb āñkhoñ meñ
koī manzar nahīñ tikTā mirī sairāb āñkhoñ meñ
na nīndeñ thiiñ na aañsū the na ḳhushiyāñ thiiñ magar tū thā
ki ab tū bhī nahīñ aatā hai in be-ḳhvāb āñkhoñ meñ
kisī bhī aa.ine meñ ab mirā chehra nahīñ dikhtā
mirā chehra nikaltā hai inhīñ betāb āñkhoñ meñ
jise ta.amīr kā Dar hai chalā jaa.e vo bin bole
jo haiñ tayyār sach ko vo raheñge ḳhvāb āñkhoñ meñ
dafa.a kar ishq kā charchā kahīñ tū bhī na bah jaa.e
abhī to bāñdh ke rakkheñ haiñ sab sailāb āñkhoñ meñ