hamāre ḳhvāb kuchh in.ikās lagtā hai

ye aadmī to hameñ rū-shanās lagtā hai

guzārishāt bhī baa.is thiiñ barhamī kā kabhī

ab us kā hukm bhī ik iltimās lagtā hai

jo apne naam se tahrīr us ne bhejī hai

hamāre ḳhat kā koī iqtibās lagtā hai

bilā-sabab ye kare bad-gumān kyuuñ āḳhir

durust! nāseh! qayāfa-shanās lagtā hai

vo ham se tark-e-ta.alluq pe ab hai āmāda

hameñ to aap kā ye ik qayās lagtā hai

ḳhudā kare ki hameñ vo duā na koī de

hameñ to kosnā hī us kā raas lagtā hai

tarāsheñ pairahan ab kuchh na.ī zamīnoñ meñ

darīda sher kā pichhlā libās lagtā hai

ye daur kaisā hai jis shaḳhs se bhī milnā ho

pareshāñ-hāl shikasta udaas lagtā hai

batā.eñ aap ko kyā hai 'matīn' kī pahchān

sarāpā dard hai tasvīr-e-yās lagtā hai